Fræðsla gegn fordómum með AFS

Viltu fá fræðslu frá okkur?

Hafðu samband!

Fræðsla sem við bjóðum upp á

Við bjóðum upp á námskeið sem henta vinnustöðum og þá sérstaklega skólum. Námskeiðin eru á bilinu 2-4 klukkustundir, eftir því hverju er óskað eftir.

Fjölmenningarleg samskipti á vinnustað

Hvernig heilsar þú fólki þegar þú kynnist þeim fyrst? Hefur þú íhugað hvernig þú ávarpar fólk? Lærum að meta fjölbreytileikann og styrkina sem felast í því að hafa fjölbreyttan hóp fólks. Ýmsir árekstrar geta átt sér stað þar sem fólk með ólíkan menningarbakgrunn kemur saman. Til að geta átt í góðum samskiptum skiptir grundvallarmáli að hafa skilning hvert á öðru. Hér er farið yfir helstu atriði sem máli skipta í fjölmenningarlegum samskiptum á þátttökumiðaðan hátt.

Samskipti og menningarlæsi

Menningarlæsi þarf ekki endilega að vera milli landa og gjörólíkra menningarheima. Það getur til að mynda verið mikill menningarmunur á milli kynslóða, landshluta eða jafnvel íþróttaklúbba. Þannig geta t.d. táningsstúlkur frá Íslandi og Kúala Lumpúr átt meira sameiginlegt en tvær konur sem aldar eru upp á Íslandi en á mismunandi tímum í sveit og í borg. Menning er heldur ekki einungis það sem sést á yfirborðinu á borð við listir og matarmenningu – menningarmunur birtist einnig í ólíkum samskiptum og óskilgreindum reglum sem erfiðara getur reynst að skilja og sjá fyrst um sinn. Nú á tímum er auðvelt að finna samsvarandi hópa og því mikilvægt að minna á fegurðina í fjölbreytileikanum og nauðsyn tilfinningagreindar í samskiptum.

Efling menningarlæsis nemenda

Á þessu námskeiði er farið yfir helstu undirstöðuatriði menningarlæsis/kenninga um menningarlæsi og mikilvægi þess í kennslu. Kennarar fá aðgang að tólum sem þróuð hafa verið af AFS á alþjóðavísu sem nýta má í kennslu til að efla menningarlæsi nemenda ásamt þjálfun og ráðgjöf í því hvernig innleiða má þetta í daglegt skólastarf. Með fræðslu um ólíka menningarheima eykst skilningur og umburðarlyndi á milli nemenda sem stuðlar að betri samþættingu og aðlögun. Með þessu má hvetja nemendur til að nálgast framandi hugmyndir, viðhorf og hefðir af forvitni og með opnum huga.

Efling borgaravirkni og samfélagsvitundar í skólastarfi

Hvað felst í því að taka virkan þátt í samfélaginu sínu? Hvers vegna er það mikilvægt? Með virkni viljum við minna á hversu mikilvægt það er að bæði vaska upp heima hjá sér sem og að kjósa í sveitastjórnar- og alþingiskosningum. Grunnhugmyndin er að láta sig hlutina varða, upplifa sig sem hluta af sínu samfélagi og leggja sitt af mörkum. Við viljum hvetja ungmenni til að horfa í kringum sig og sjá hvar þau vilja hafa áhrif – og valdefla þau út frá því að láta til sín taka.

Sérsniðnar vinnustofur

Við viljum endilega koma til móts við þínar þarfir! Hafðu samband og við getum hannað vinnustofu eða námskeið sem hentar þínum veruleika.

Hvernig er hægt að auka menningarfærni innan hefðbundins skólakerfis?

Með því að bjóða upp á fræðslu um menningarlæsi innan veggja skólans. Þetta má til að mynda gera í tungumálatímum, í samfélagsfræðitímum og í lífsleikni. Hér má finna leiðir sem hægt er að nota í kennslu til að styrkja menningarvitund nemenda en þessi tól voru þróuð af AFS í samstarfi við önnur samtök og styrkt af Erasmus+ áætluninni. AFS á Íslandi býður upp á fræðslu fyrir kennara um hvernig hægt er að byggja upp menningarvitund nemenda og geta skólar t.a.m. boðið upp á slíka fræðslu á starfsdögum.

Hvers konar fræðslu býður AFS upp á?

AFS eru fræðslu- og friðarsamtök sem ekki eru rekin í hagnaðarskyni. Meginmarkmið samtakanna er að bjóða upp á þvermenningarleg námstækifæri þar sem hægt er að öðlast þá þekkingu, færni og skilning sem þarf til að vinna að réttlátari og friðsamari heimi. Okkar helsta áhersla til að mæta þessu markmiði hefur alla tíð verið á að senda og taka á móti skiptinemum, ásamt því að fræða skiptinema, fjölskyldur þeirra og sjálfboðaliða um menningu og menningarlæsi. Þetta hafa samtökin gert í yfir 60 ár, en við tökum einnig að okkur að fræða fólk um menningu og samskipti, t.d. í skólum og fyrirtækjum auk þess að taka þátt í viðburðum tengdum fjölmenningu. Aukin áhersla hefur verið lögð á slíka fræðslu hjá AFS á alþjóðavísu og hafa orðið miklar framfarir í þeim málum á síðustu árum.

Innan samtakanna býr því mikil þekking um menningarlæsi og samskipti milli menningarheima. Við teljum að færni í menningarsamskiptum eigi erindi við alla, ekki bara skiptinema og fósturfjölskyldur. Slík færni er mikilvæg til að sporna gegn fordómum og menningarlegum árekstrum og stuðla að auknu umburðarlyndi í samfélaginu og verður sífellt mikilvægari með aukinni alþjóðavæðingu. Við teljum að menntun sem styður við menningarlega fjölbreytni hafi vaxandi vægi í fjölmenningarsamfélagi nútímans. Því höfum við á undanförnum misserum lagt sérstaka áherslu á að koma slíkri fræðslu víðar út í samfélagið og bjóðum því upp á námskeið því tengdu, en finna má nánari upplýsingar um það hér.

Hvers konar námsaðferðir notast AFS við?

Við vinnum mest með ungu fólki og notumst við óformlegt nám (e. Non-formal learning) og upplifunarnám (e. experiential learning) þar sem lögð er áhersla á að hópurinn læri saman með fjölbreyttum aðferðum. Í allri okkar fræðslu leggjum við okkur fram við að skapa öruggt rými þar sem fólk er hvatt til að tjá ólíkar skoðanir á hlutunum og læra að bera virðingu fyrir skoðunum annarra. Við leiðum hópinn í gegnum lærdómsferlið og hvetjum til þátttöku og gagnrýninnar hugsunar. Í allri fræðslu sem AFS býður upp á er leitast við að nota fjölbreyttar, óformlegar námsaðferðir sem henta ólíkum einstaklingum, hvetja til þátttöku og nýta styrkleika hópsins.