Hver getur sótt um skiptinám?

Nemar sem fara í skiptinám þurfa að vera við góða heilsu, bæði líkamlega og andlega. Ef þú hefur átt við þunglyndi, kvíða, átröskun eða greinst með sykursýki, astma, ofnæmi eða aðra sjúkdóma þurfum við að fá greinagóðar upplýsingar frá lækni/sálfræðingu sem þú hefur verið hjá til þess að meta umsóknina þína. Þá þarftu að geta sýnt fram á að þú hafir verið við góða heilsu í 18 mánuði áður en skiptinám hefst. Í sumum tilfellum þarf lengri tíma til að ná heilsu og stundum metur AFS svo að það sé nemanum í hag að bíða með skiptinám.

Erfitt getur reynst að finna fjölskyldur fyrir nema með miklar sérþarfir hvað varðar matarræði. Slík tilvik þarf því að skoða sérstaklega. Best er ef nemar eru opnir fyrir fjölbreyttri matargerð.

Skiptinám er skólaprógramm og mikilvægt að stunda skólann vel. Skólakerfi eru mismunandi á milli landa en alltaf eru kröfur (bæði frá AFS og skóla) þær að neminn leggi sig mikið fram, geri sitt besta og fari að reglum skólans. Þetta á bæði við í heimalandi og dvalarlandi. Þetta þýðir ekki að þú verðir að vera með toppeinkunnir þegar þú sækir um skiptinám, en stór frávik eða föll í fögum ganga ekki. Stundum eru skiptinemar með yngri árgangi í skóla.

Það eru fá lönd sem gera kröfu um tungumálakunnáttu fyrir skiptinámið. Ef þú hefur litla þekkingu á málumhverfinu í dvalarlandinu, ráðleggjum við þér að kynna þér grunnhugtök og algeng orð fyrir brottför. Best er að vera búinn að ljúka tungumálanámskeiði fyrir brottför. Tungumálakunnátta er mjög hjálpleg þegar kemur að aðlögun og þú verður fljótari að ná tökum á tungumálinu sértu vel undirbúinn.

Sum AFS lönd gera stífari kröfur en önnur til umsækjenda, aðal ástæðan er að það getur verið erfitt að finna nemum fósturfjölskyldur eða að skólar þar í landi taka aðeins á móti ákveðnum hópi nemenda. Sum lönd taka t.d. helst ekki á móti grænmetisætum, umsækjendum með einhverja sjúkdóma, ákveðin ofnæmi eða nemum sem þurfa sérstakt mataræði. Við myndum helst vilja að þessi atriðið kæmu ekki í veg fyrir skiptinám en á sama tíma þurfum við að taka mið af staðháttum í hverju landi. Þú finnur frekari upplýsingar um skilyrði landa undir hverju prógrammi.